Alp Arslan adyndaky Milli drama teatrynyň döredijilik topary tarapyndan “Biken” I-Halkara teatr festiwalynyň çäklerinde görkezilen “Magtymguly Pyragy” spektakly emin agzalarynyň ýokary bahasyna mynasyp bolup, birnäçe nominasiýada tapawutlandy. Bu barada "Türkmenistan: Altyn Asyr" neşiri habar berýär.
Şeýlelikde, teatryň çeper ýolbaşçysy, Türkmenistanyň at gazanan artisti Handurdy Berdiýew drama sahnasynyň iň gowy režissurasy üçin teatr we kino aktrisasy Biken Rimowanyň 100 ýyllygy mynasybetli geçirilen festiwalyň diplomyna we altyn medalyna mynasyp boldy.
Hudožnik-sahna goýujy Mekan Annamyradow spektakla iň gowy sahna bezegi üçin ýadygärlik Kubogy bilen sylaglandy. Mundan başga-da, Alp Arslan adyndaky Milli drama teatrynyň döredijilik toparyna Halkara Türki medeniýetiniň guramasynyň (TÜRKSOY) diplomy, Taldykorgan sebitiniň akimatyndan minnetdarlyk haty we 400 müň Gazagystan teňňesi mukdarly şahadatnama gowşuryldy.
Türkmenistanyň teatr toparynyň sahnasy beýik şahyr we akyldar Magtymguly Pyragynyň ömri we döredijiligi barada gürrüň berýär. Sahnada şahyryň keşbini Türkmenistanyň at gazanan artisti Döwlet Hanmämmedow ýerine ýetirdi.
29-njy sentýabrdan 4-nji oktýabr aralygynda Gazagystanyň Taldykorgan şäherinde geçirilen “Biken” I-Halkara teatr festiwaly Gazagystan Respublikasynyň Medeniýet we sport institutynyň, Žetysu welaýatynyň akimatynyň we TÜRKSOY halkara guramasynyň goldaw bermeginde geçirildi.
Festiwalyň çäklerinde Azerbaýjandan, Gazagystandan, Gyrgyzystandan, Türkiýeden, Türkmenistandan we Özbegistandan teatr jemgyýetiniň wekilleri iň gowy teatr eserlerini görkezdiler. Şeýle-de, festiwalyň dowamynda Biken Rimowanyň döredijiligine we onuň sahna sungatyna goşan goşandyna bagyşlanyp konferensiýa geçirildi.
