13-14-nji oktýabrda 2023-nji ýylda Türki dünýäsiniň medeni paýtagty bolan Azerbaýjanyň Şuşa şäherinde TÜRKSOÝ-a agza ýurtlaryň hemişelik Medeniýet ministrleriniň 40-njy ýygnagy geçiriler.
TÜRKSOÝ-nyň Baş sekretarynyň orunbasary Sait Ýusufyň bellemegine görä, ýygnaga guramany esaslandyryjy 6 ýurduň—Türkiýäniň, Azerbaýjanyň, Gazagystanyň, Gyrgyzystanyň, Türkmenistanyň, Özbegistanyň medeniýet ministrleri gatnaşar.
Däp bolşy ýaly, ýygnakda TÜRKSOÝ-nyň işleri ara alnyp maslahatlaşylar, 2024-nji ýyl üçin meýilnamalar yglan ediler we degişli kararlar kabul ediler.
Duşuşykda 2024-nji ýylda “Türki dünýäsiniň medeni paýtagty” statusy Türkmenistanyň Änew şäherine geçiriler.
Şunuň bilen baglylykda, indiki ýyl Änewde döredijilik toparlarynyň we beýleki döwletleriň wekiliýetleriniň gatnaşmagynda geçiriljek medeni çäreleriň meýilnamasy taýýarlanýar. Hususan-da, ylmy, ýaşlar we metbugat forumlaryny, meşhur estrada aýdymçylarynyň konsertlerini, şekillendiriş we bezeg sungatynyň sergilerini we başgalary guramak meýilleşdirilýär.
