Karnegi institutynyň biologlaryndan we astrofiziklerinden ybarat topar Ýerden daşary ýaşaýşy gözlemegiň täze usulyny işläp düzdi. Hünärmenler janly we jansyz tebigatyň predmetlerini tapawutlandyrmaga ukyply emeli intellekti döretdiler. Bu barada MIR24 habar berýär.
Alymlar algoritmi işläp düzenlerinde 134 abiotik we biotik nusgalaryň molekulýar barlaglarynyň maglumatlaryny ulandylar. Täze neýroulgam 90%-e çenli takyklyk bilen biologiki gelip çykyşy bolan nusgalary kesgitledi. Aýratynam, emeli intellekt ýaşy ýüzlerçe million ýyl bolan çaňňalaklar, süňkler, saçlar, öýjükler we daşa öwrülen zatlar ýaly obýektleri kesgitledi.
Gözlegçiler bu işiň Marsyň üstüni öwrenmekde kömek etjekdigini çaklaýarlar, sebäbi seljeriş üçin nusgalary Ýere ibermek zerurlygy bolmaýar. Şeýle-de, neýroulgamy Ýupiteriň Ýewropa hemrasynyň ýaşamak üçin ýaramlydygyny ýa-da däldigini anyklamak, Ýerdäki birnäçe ylmy tapmaçalary çözmek üçin ulanmak göz öňünde tutulýar. Hususan-da, ol 3,5 mlrd ýyl mundan ozal emele gelen çökündilerdäki gadymy mikroblary gözlemek üçin ulanylar diýip, PNAS žurnaly ýazýar.
