«Porsche» 2024-nji ýyl üçin niýetlenen «Cayenne S E-Hybrid» ulagyny tanyşdyrdy. Kompaniýa ony adaty «E-Hybrid» bilen iň kuwwatly «Cayenne Turbo E-Hybrid» ulaglarynyň iň gowy aralygy diýip atlandyrýar.
2024-nji ýyl üçin niýetlenen «Cayenne S E-Hybrid» 348 at güýjüni öndürýän 3.0 litrlik turbo görnüşli V6 hereketlendirijisi we 174 at güýji kuwwaty bolan elektrik hereketlendirijisi bilen üpjün edildi. Ulgamyň umumy kuwwaty 512 at güýjüne deňdir.
Elektrik hereketlendirijisi 25,9 kWt sagat sygymy bolan batareýa bilen işleýär, 11 kW kuwwatly zarýad beriji bolsa adaty 2-nji derejeli zarýad beriji ulanylanda, takmynan, 2,5 sagatda zarýadyny doldurmaga mümkinçilik berýär.
Bu transmissiýa ulagy 96 km/sag tizlige bary-ýogy 4,4 sekuntda çykarmaga we çärýek mil aralygy 13 sekuntda geçmäge mümkinçilik berýär, bu görkeziji gibrid däl goşa turbo görnüşli «Cayenne S-den» 0,1 sekunt çaltdyr.
«Cayenne S E-Hybrid» ulagynda täze iki kameraly, iki klapanly pnewmatika podweskasy ornaşdyrylandyr, bu düýpgöter tapawutlanýan rahat we sport sürüşi tertibini üpjün edýär.
«Cayenne S E-Hybrid-iň» içinde sekiz tarapa güýji sazlanýan oturgyçlar, «Sport Chrono» toplumy we poslamaýan polat pedallary bar. Ulagyň salony «Silvershade» reňkinde ýerine ýetirildi. Ulagy «Apple CarPlay» ulgamyny goldaýar, şeýle hem ýolagçy tarapda ýene bir ekran bar.
Ulagyň bahasy ABŞ-da 100750 dollardan başlanýar, «Cayenne S E-Hybrid Coupe» ulagynyňky bolsa 105650 dollardan başlanýar. Bu model ABŞ-nyň dilerlerine 2024-nji ýylyň ýazynda geler.
