Şuşa 2024-nji ýyl üçin Yslam dünýäsiniň medeni paýtagty diýlip yglan edildi. Report agentliginiň belleýşi ýaly, bu barada Azerbaýjanyň Medeniýet ministrligi habar berdi.
Dohada geçirilýän Yslam dünýäsiniň Medeniýet ministrleriniň 12-nji konferensiýasynda, yslam dünýäsiniň medeni paýtagty boýunça ISESCO programmasynyň çäklerinde Azerbaýjanyň medeniýet ministri Adil Kerimli 2024-nji ýylyň Yslam dünýäsiniň medeni paýtagty hökmünde Şuşa şäheriniň dalaşgärligini hödürledi.
Çärede Şuşa barada wideo görkezildi. Konferensiýa gatnaşyjylaryň biragyzdan goldamagy netijesinde Şuşa 2024-nji ýyl üçin Yslam dünýäsiniň medeni paýtagty diýlip yglan edildi.
Şuşa şäheri Azerbaýjanyň taryhy, medeni, jemgyýetçilik-syýasy durmuşynyň möhüm merkezleriniň, şol sanda yslam siwilizasiýasynyň nyşanlaryndan biridir.
2022-nji ýyl Azerbaýjanda “Şuşa şäheriniň ýyly” diýlip yglan edildi. Şäheriň medeni durmuşynyň gaýtadan dikelmegine goldaw bermek maksady bilen aýdym-saz festiwallary, şygryýet günleri, milli we halkara derejesindäki köp sanly medeni çäreler geçirildi. Türki medeniýetiniň halkara guramasy (TÜRKSOY) Şuşany 2023-nji ýylyň Türki dünýäsiniň medeni paýtagty diýip yglan etdi.
