Baku şäherindäki «Circus Sea Breeze» sirk toplumynda «Galkynyş» milli at üstündäki oýunlar toparynyň artistleriniň çykyşy boldy. Täsirli çykyşlary görkezmäge Türkmenistanyň Döwlet sirkiniň we Arkadag şäheriniň Görogly adyndaky Döwlet atçylyk sirkiniň artistleri hem gatnaşdy.
Türkmenistanyň DIM-iniň saýtynda habar berlişi ýaly, artistler ahalteke bedewleriniň üstünde milli jigitlik sungatynyň ajaýyp nusgalaryny we çylşyrymly akrobatik hereketleri görkezdi. Şeýle çykyşlar tomaşaçylarda uly gyzyklanma döretdi.
At üstündäki oýunlardan başga-da, tomaşaçylara sirkiň beýleki žanrlaryna degişli çykyşlar hem görkezildi, bu bolsa tomaşanyň has-da baý we täsirli bolmagyny üpjün etdi.
«Circus Sea Breeze» arenasyndaky çykyş «Galkynyş» milli at üstündäki oýunlar toparynyň Azerbaýjan Respublikasyna amala aşyrýan saparynyň bir bölegi boldy. Türkmen artistleriniň ýurtdaky çykyşlarynyň 30-njy marta çenli dowam etmegine garaşylýar.
