Ýewropalylaryň takmynan 98%-i aşa zyýanly hapalanan howadan dem alýar, bu bolsa her ýylda 400 müň adamyň heläk bolmagyna sebäp bolýar diýip, The Guardian çarşenbe güni habar berdi.
Gazet hemra we gözegçilik stansiýalary tarapyndan toplanan maglumatlara salgylanyp, ýewropalylaryň 98% -iniň aşa zyýanly mikrobölejikleriň howada Bütindünýä Saglygy goraýyş guramasynyň maslahat berýän derejesinden aşa artyk ýerlerde ýaşaýandygyny tassyklaýar. Şol bir wagtyň özünde, raýatlaryň üçden iki bölegi zyýanlylygy BSGG tarapyndan kesgitlenen çäkden iki esse diýen ýaly ýokary sebitlerde ýaşaýarlar.
Demirgazyk Makedoniýada ýagdaý iň erbedi, ilatyň üçden iki bölegi zyýanly PM2.5 bölejikleriniň derejesi BSGG-nyň standartyndan dört esse köp bolan sebitlerde ýaşaýar. Şeýle hem, ýurduň paýtagty Skopýe ýaly käbir sebitlerde bu norma alty esse ýokarydyr.
Umuman aýdanyňda, gündogar Ýewropadaky ýagdaý onuň günbatar böleklerine garanyňda hasam ýaramaz. Italiýa muňa girmeýär, çünki ýurduň demirgazygyndaky mikrobölejikleriň sany normadan dört esse artykdyr.
Hünärmenler howanyň hapalanmagynyň her ýyl Ýewropada takmynan 400 müň adamyň heläk bolmagyna sebäp bolýandygyny bellediler. Şol bir wagtyň özünde, eger howanyň hili BSGG standartlaryna laýyk gelýän bolsady, onda bu adamlaryň 200 müňden gowragyny halas edip bolardy.
