«Volkswagen» kompaniýasy «Tiguan» krossoweriniň üçünji neslini tanyşdyrdy. Germaniýanyň awtoulag öndürijisi täze önümiň 2024-nji ýylyň birinji çärýeginde satuwa çykaryljakdygyny mälim etdi.
Täze «Volkswagen Tiguan» bu awtoulag brendiniň «Passat» (B9), «Tavendor» we «Talagon» ýaly beýleki nusgalaryna hem esaslanýan «MQB evo» platformasynda guruldy. Krossower elektrik energiýasy arkaly, takmynan, 100 km geçmäge mümkinçilik berýän gibrid ulgam, 20 dýuýmlyk tekerler we aerodinamiki garşylyk koeffisiýenti 0,28 bolan (ikinji neslinde 0.33) kuzow bilen üpjün edildi.
Hereketlendiriji ulgamy turbo görnüşli dizel we benzin motorlaryny, gibrid elektrik ulgamyny öz içine alýar. Täze «Tiguan» «MQB evo» platformasyndaky täze nesil matrisa faralary bolan ilkinji nusgadyr. Bu nusga ikinji nesil krossower bilen deňeşdirilende, 3 sm uzyndyr, emma beýikligi, ini we teker binýady üýtgedilmedi. Goş goýulýan (bagaž) bölüminiň göwrümi 37 litr artdyrylyp, 652 litre ýetirildi.
«Tiguan» kämilleşdirilen, uýgunlaşmaga ukyply asma gurluşlar, massažly we howalandyryşly oturgyçlar hem-de sürüjä kömek ulgamlary, şol sanda zolagy çalyşmak üçin kömekçi we smartfon arkaly uzakdan awtomatiki ýagdaýda awtoulagy duralgada ýerleşdirmek mümkinçiligi bilen üpjün edildi. Salonda sanly gural paneli, proýeksiýa displeýi we 15 dýuýmlyk media ulgam ekrany ornaşdyryldy.
