Täze Zelandiýaly Lesli Harris Ginnesiň rekordlar kitabyna girizildi. Ol 98 ýaşyny bellemeginden birnäçe hepde öň Oklend şäherinde geçirilen motosikl festiwalyna gatnaşdy.
Harrise 64 ýaşly ogly Rod we 21 ýaşly agtygy Oliwiýa ýoldaş boldy. Düzgüne laýyklykda, gatnaşyjylar iň durnukly aýlaw wagtyny görkezmelidiler. Netijede, uly ýaşly motosürüji öz çagalaryndan öňe geçdi – Harris 4-nji, ogly sekizinji, agtygy bolsa 21-nji orny eýeledi.
UPI agentliginiň habar bermegine görä, Täze Zelandiýanyň ýaşaýjysy ilkinji gezek 1953-nji ýylda motosikl sürüp görüpdir, 93 ýaşynda bolsa ýaryşda ýeňiji bolupdyr. 2019-njy ýylda ol buduna operasiýa geçirdi we halaýan ulagyny diňe şu ýyl dolandyryp bildi.
Harrisiň bellemegine görä, ol şu ýyl ýene birnäçe ýaryşa gatnaşmak isleýär, 2024-nji ýylda bolsa Pukeko şäherinde geçiriljek nusgawy motosiklleriň festiwalyna gatnaşar.
