Hindistandan 15 ýaşly ýetginjek iň uzyn saçyň eýesi hökmünde ýetginjekleriň arasynda dünýä rekordyny goýdy. Onuň ady Sidak Singh Çahal we ol ömründe ýeke gezek hem saçyny kesdirmedi we kesdirmek islemeýär. Bu barada Ginnesiň rekordlar kitaby habar berýär diýip, rbclife.ru belleýär. Bu ýaş ýigidiň rekordy 2024-nji ýylyň neşirine girizildi.
Ýetginjegiň saçynyň uzynlygy 146 sm bolup, bu erkek ýetginjekleriň arasynda dünýä rekordydyr. Rekord eýesi saçyny hepdede iki gezek ýuwýar we guradýar, her gezek munuň üçin ýakynlarynyň kömegi we azyndan bir sagat wagt gerek bolýar.
Bellenilişi ýaly, Sidak sikh bolany üçin saçyny ösdürýär (sikhizme eýerijiler diniň talap edişi ýaly saçlaryny kesmeýärler). Adatça, ýetginjek saçyny toplap, sikhlerde däp bolşy ýaly, ony ýörite selle bilen örtýär.
Saçyny ýuwmakdan we guratmakdan daşary Sidak adaty ýetginjek durmuşynda ýaşaýar: bilim alýar, türgenleşýär, okaýar we wideo oýunlaryny oýnaýar.
Belläp geçsek, häzirki wagtda uly ýaşly adamlaryň arasynda saçyň uzynlygy boýunça rekord ýok we Sidak 18 ýaşyna ýetende bu titula hem eýe bolmagy maksat edinýär.
Ýeri gelende bellesek, ýetginjek gyzlaryň arasynda iň uzyn saç onuň watandaşy Nilanşi Pateldedi. Ol saçyny 200 sm çenli ösdürip, dünýä rekordyny goýdy, soňra 2021-nji ýylda saçyny kesdirip, örüm saçy muzeýe sowgat etdi.
