Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkmenistanyň Gahrymany, kosmos işi boýunça «Roskosmos» döwlet korporasiýasynyň tälimçi-kosmonawt-synagçysy, kosmonawtlar toparynyň serkerdesi Oleg Kononenko we öz ömrüni kosmonawtika bilen baglan ähli adamlara bütin adamzadyň ösüşine gönükdirilen gaýduwsyz zähmeti üçin tüýs ýürekden minnetdarlyk bildirdi.
«Häzirki zaman dünýäsinde kosmonawtika düýpli ylmy barlaglary talap edýän we ýokary tehnologiýalar pudagydyr. Kosmos we ýer hadysalarynyň arasyndaky özara baglanyşygyň öwrenilmegi, kosmos barlaglarynyň geçirilmegi, onuň netijeleriniň iş ýüzünde peýdalanylmagy innowasion tehnologiýalaryň ösüşiniň çeşmesi bolup hyzmat edýär. Hut kosmosyň öwrenilmegi netijesinde, biziň durmuşymyzda adamlaryň ýaşaýşyny ýeňilleşdirýän, senagat ösüşini üpjün edýän täze işläp taýýarlamalar ýüze çykýar. Köp adamlar üçin kosmonawtlaryň ylmy-barlag işleri uly gyzyklanma döredýär.
Men Siziň «TASS» habarlar agentliginiň ýörite habarçysy hökmünde Halkara kosmos stansiýasyna meýilleşdirýän täze kosmos ekspedisiýaňyz baradaky habary watandaşyňyz hökmünde buýsanç duýgusy bilen kabul etdim. Siziň işleriňiziň netijesiniň köp millionly okyjylaryň älem giňişligine akyl ýetirmeginde möhüm maglumat çeşmesi boljakdygyna ynanýaryn» diýip, Gahryman Arkadagymyz belledi.
Şu ýakymly mümkinçilikden peýdalanyp, türkmen halkynyň Milli Lideri, Türkmenistanyň Halk Maslahatynyň Başlygy Oleg Kononenko berk jan saglyk, abadançylyk, şowly we howpsuz uçuşy arzuw etdi.
Öň habar berşimiz ýaly, Ý.A.Gagarin adyndaky Kosmonawtlary taýýarlaýyş merkeziniň başlygynyň orunbasary, Roskosmos-yň 15-nji sentýabrda Halkara kosmos stansiýasyna (HKS) ugrajak kosmonawtlar toparynyň serkerdesi, Türkmenistanyň Gahrymany Oleg Kononenko TASS-yň bortdaky dördünji habarçysy bolar.
