«Peugeot» kompaniýasy «3008» krossoweriniň ikinji nesliniň ilkinji çykyşyndan ýedi ýyl soň onuň täze nusgasyny tanyşdyrdy. Täze ulag «E-3008» diýlip atlandyrylýar we diňe elektrik hereketlendirijileri bilen enjamlaşdyrylandyr diýip, fransuz kompaniýasynyň metbugat gullugy habar berdi.
«Peugeot E-3008» «Stellantis» konserni tarapyndan işlenip düzülen täze «STLA Medium» platformasynda döredilen ilkinji nusga boldy. Kompaniýada krossoweriň, takmynan, 400 kg gurluşlarynyň ekologiýa taýdan arassa materiallardan ýasalandygyny aýtdylar. Ýeňil awtoulagyň uzynlygy 4,5 metre deňdir, salonda 21 dýuýmlyk giň ekran ýerleşdirilendir, goş goýulýan bölümiň (bagažnigiň) göwrümi bolsa 520 litrdir. Täze nusga iki görnüşde we üç sany elektrik geçirijili nusgada hödürlener.
Birinjisinde elektrik hereketlendirijiniň kuwwaty 210 at güýjüne, bir zarýadda geçýän aralygy 525 km-e deňdir. Kuwwaty 326 at güýji bolan iki hereketlendirijili, ähli tekerleri hereketli nusga hem bir zarýadda şol aralygy geçmäge ukyplydyr. «E-3008-iň» iň uzak aralygy geçmäge ukypdy nusgasynda kuwwaty 230 at güýji bolan bir elektrik hereketlendirijisi ýerleşdirildi, şeýle krossoweriň geçip biljek iň uzak aralygy 700 km. Çalt zarýad bermek tehnologiýasy ýarym sagadyň dowamynda batareýanyň energiýasyny 20%-den 80%-e çenli doldurmaga mümkinçilik berýär.
Täze «Peugeot E-3008-iň» önümçiligi Fransiýanyň Soşo şäherindäki zawodda ýola goýlar. Awtoulaglar 2024-nji ýylyň fewral aýynda satuwa çykarylar.
