«Renault» fransuz kompaniýasy Mýunhende geçirilen «IAA Mobility 2023» sergisinde ýedi orunlyk «Grand Kangoo» kompakywenini tanyşdyrdy. Bu barada brendiň metbugat gullugy habar berýär.
Awtoulagda ýedi aýry oturgyjyň bardygy bellenilýär – üçüsi ikinji hatarda, öňdäki we üçünji hatarlaryň hersinde ikisi ýerleşýär. Ulagyň ýük goýulýan bölümi (bagažnigi) 500 litrlik göwrüme eýedir, yzky oturgyçlar aýrylyp, ol 3750 litre çenli giňeldilip bilner. Bu ýagdaýda daşalýan ýükleriň uzynlygy 3,1 metre çenli ýetip biler.
Awtoulag 95 we 130 at güýji kuwwaty bolan ýangyç hereketlendirijili hem-de 122 at güýji kuwwaty bolan elektrik hereketlendirijili nusgalarda elýeterli bolar.
«Renault Grand Kangoo-nyň» satuwy şu ýylyň ahyrynda başlanar we ilkinji awtoulaglar 2024-nji ýylyň başynda müşderilere ýetiriler. Ulagyň nusgalarynyň bahalary soň yglan ediler.
