«Mini» «Cooper» we «Countryman» kysymlarynyň täze neslini tanyşdyrdy. Olaryň ikisi hem diňe elektrik hereketlendirijileri bilen enjamlaşdyrylar diýip, öndürijiniň metbugat gullugy habar berýär.
Bäşinji nesil «Mini Cooper» üýtgeşmä baglylykda, 184 at güýjüne (290 Nm) ýa-da 218 at güýjüne (330 Nm) eýe bolar. Birinji ýagdaýda hetçbek goşmaça zarýad almazdan 305 km, ikinjisinde bolsa 402 km çenli ýol geçip biler. Iň güýçli nusgasy 100 km tizlige 6,7 sekuntda ýetmäge ukyplydyr.
Täze «Countryman» ulagynyň esasy nusgasy 204 at güýjüne (250 Nm) eýedir. Has gymmat nusgasynda çekiş ähli tekerlere geçirilýär, onuň hereketlendirijisi 313 at güýji öndürýär (494 Nm) we duran ýerinden 100 km/sag tizlige 5,6 sekuntda çykýar. Kuwwat ätiýaçlygy – öňdäki tekerleri hereketli nusgasynda 462 km-e çenli, ähli tekerleri hereketli nusgasynda bolsa 433 km-e çenlidir.
Iki nusganyň hem salonynda diametri 240 millimetr bolan tegelek OLED ekrany bardyr, ol gurallar paneliniň we multimediýa ulgamynyň funksiýalaryny özünde jemleýär hem-de sesli dolandyrylýar. «Cooper» we «Countryman» kysymlarynyň salonynda tormoz dolandyryşy, hereketlendiriji düwmesi, sesli dolandyryş, şeýle hem smartfon üçin simsiz zarýad beriji ýerleşdirilendir.
Şeýle hem kompaniýa 2024-nji ýylyň aprelinde «Mini Aceman» tanyşdyryljakdygyny mälim etdi.
