International Workplace Group (IWG) maslahat beriş kompaniýasy tarapyndan taýýarlanan işlemek we dynç alyş üçin iň oňat şäherleriň sanawynda Barselona birinji orunda durýar. Sanawda jemi 26 şäher bar.
IWG sanawynyň ilkinji bäşligine Toronto, Pekin, Milan we Nýu-Ýork hem girdi diýip, CNBC habar berdi. IWG-iň dolandyryjysy Darren Rojers: "Kategoriýalar daşary ýurtda işlemek üçin iň amatly şertlere esaslanyp saýlandy" - diýdi.
Şäherlere aşakdaky ölçeglere laýyklykda baha berildi:
- howasy,
- medeni durmuşynyň baýlygy,
- ýaşaýyş jaýynyň elýeterliligi (dollarda kärendäniň ortaça bahasy),
- ulag (aýlyk ulag peteginiň bahasy),
- azyk önümleriniň bahasy,
- internetiniň tizligi,
- bagtlylyk derejesi,
- gibrid iş ýerleriň bolmagy.
Barselonada jaýy kärendesine almagyň ortaça bahasy aýda 1158 dollar. Deňeşdirmek üçin: Nýu-Ýorkda öýüň aýlyk kärendesi ortaça 3 632 dollar. Barselonada bir kofe, Los Anželesdäki 4,92 dollar, Pekindäki 4,57 dollar bilen deňeşdirilende, 2,68 dollar.
IWG gibrid režimde işleýän hünärmenler bilen söhbetdeşlik geçirdi, ýagny aralykdan işlemäge hem, ofisde işlemäge hem mümkinçilik bar. Gözlegiň netijelerine görä, pikir soraşma gatnaşanlaryň 57% -i daşary ýurda syýahat etmegi we işlemegi ileri tutýar.
