Barselonanyň binagärlik dürdänesi bolan Sagrada Familiýa ybadathanasy merkezi binanyň üstünde haçyň täze bölegi oturdylandan soň resmi taýdan dünýäde iň beýik ybadathana boldy diýip, Associated Press habar berýär.
Indi ybadathananyň beýikligi 162,91 metre barabar bolup, bu 1890-njy ýyldan bäri (ybadathananyň gurluşygy XIV asyrda başlandy we XIX asyrda tamamlandy) bu ada eýe bolan Germaniýadaky Ulm ybadathanasyndan sähel uludyr. Onuň beýikligi 161 metre ýetýär.
Ýakyn aýlarda Isanyň merkezi diňinde haçyň galan bölekleri oturdylar. Şondan soň onuň beýikligi 172 metre ýeter.
1882-nji ýylda Fransisko de Paul del Wilýaryň ýolbaşçylygynda Sagrada Familiýa ybadathanasynyň düýbi tutuldy, ýöne bir ýyldan bu taslama binagär Antonio Gaudi ýolbaşçylyk etdi. Ol ilkibaşdaky meýilnamany doly üýtgedip, şeýle bir uly ybadathanany göz öňünde tutdy welin, hatda gurluşygyň ahyryna çenli öz ömrüniň ýetmejekdigini-de bilýärdi. Şol sebäpli binagär 1914-nji ýyldan başlap galan ähli sargytlaryndan ýüz öwrüp, özüni diňe Sagrada Familiýanyň gurluşygyna bagyş etdi. 1926-njy ýylda binagäriň aradan çykan pursaty diňe bir diň taýýardy.
Gurluşyk onuň meýilnamalary we eskizleri boýunça dowam etdi. Işler haýyr-sahawatlaryň we ybadathananyň açyk bölegine petek satmakdan gazanylan serişdeleriň hasabyna maliýeleşdirildi. Sagrada Familiýa diňe bir Barselonanyň däl, eýsem bütin dünýäniň iň köp barylýan ýerleriniň biri boldy.
Soňky onýyllykda gurluşyk ep-esli çaltlaşdy. Merkezi diňiň gurluşygy 2026-njy ýylda, Gaudiniň aradan çykan gününiň ýüzýyllygy bellenende tamamlanar. Şondan soň gurluşykçylar geljek on ýylyň dowamynda ybadathanany tamamlamagy dowam etdirer: olara täze bezeg elementlerini we heýkelleri döretmek, şeýle-de binanyň baş girelgesi üçin basgançak gurmak gerek.
