Toyota Motor kompaniýasy 29-njy awgustda, sişenbe güni irden başlanan ulgam näsazlygy sebäpli Ýaponiýadaky 12 zawodynda işini togtatmaga mejbur boldy diýip, Nikkei neşiri habar berdi.
Toyota we Lexus awtoulaglarynyň önümçiligine zyýan ýetdi. Işindäki bökdençlik sebäpli Ýaponiýanyň iň iri awtoulag öndürijisi bölek şaýlar üçin sargytlary taýýarlap bilmeýär. Toyota gündiz zawodlarynyň işiniň dikeldiljegi-dikeldilmejegi barada heniz belli bir zat aýtmady.
Içerki 14 sany zawodyň 28 önümçilik liniýasyndan 12 zawodda 25 liniýa togtadyldy. Fukuoka prefekturasyndaky Miýate zawodynda iki liniýa we onuň Daihatsu golçur kärhanasynyň Kýoto zawodynda bir liniýa bu habar ýazylan wagtynda (Tokio wagty bilen 12:00 töweregi) heniz işleýärdi.
"Bökdençligiň sebäbini kesgitlemek we ulgamy dikeltmek üçin işläris" – diýip, Toyotada mälim etdiler.
Toyota-yň paýnamalary irden 0,4% açyldy, ýöne habar ýaýradylandan soň maýadarlar satyp başladylar we irden söwdalaşyklar wagtynda paýnamalar 0,8% düşdi.
