Toyota benzin bilen işleýän meşhur Grand Highlander ulagynyň önümçiligini artdyrmak üçin ABŞ-da elektrik ulaglarynyň öndürilişini gijikdirýär diýip, Bloomberg habar berýär.
Ýapon awtoulag öndürijisi Jorjtaun zawodynda (Kentukki ştaty) täze elektrikli wnedorožnigiň önümçiligine badalga bermegiň möhletini 2026-njy ýyldan 2028-nji ýyla geçirdi. Bu benzin we gibrid görnüşlerinde bar hem-de kompaniýanyň iň geçginli ulaglaryndan biri bolan Grand Highlander-iň önümçiligini artdyrmaga mümkinçilik berer. Şeýle hem, zawodda üç hatarly elektrik wnedorožniginiň çykarylyp başlanjak senesi hem 2025-nji ýyldan 2026-njy ýylyň ahyryna geçirildi.
Gijikdirmeler ABŞ-da elektrik ulaglaryna islegiň peselmegi bilen bagly ýüze çykdy, bu ýagdaý elektrik ulagynyň alyjylary üçin salgyt ýeňillikleriniň ýatyrylmagy bilen has-da güýçlenip biler. Cox Automotive-iň berýän maglumatlaryna görä, ABŞ-da elektrik ulaglarynyň satuwy 2024-nji ýylda 7,3 göterim artyp, 1,3 million birlige ýetipdi, ýöne Toyota 30 müňden hem az doly elektrik awtoulag satdy, gibrid modellerine bolan isleg welin ep-esli artdy.
Şol bir wagtyň özünde, benzin we gibrid ulaglarynyň meşhurlygy ýokary bolmagynda galýar. Kompaniýa iýun aýynda 11 577 sany ortaça ölçegdäki Grand Highlanders ulaglaryny satdy we aýy dilerlerdäki üç günlük ätiýaçlyk bilen tamamlady.
"Bu ulag hatarda iň geçginli önümimizdigini subut etdi" – diýip, Toyota-nyň ABŞ-daky satuw bölüminiň başlygy Dewid Krist mälim etdi.
