«Subaru» içerki bazarynda biraz täzelenen ýolsuz ýerler üçin niýetlenen «Forester» ulagyny (wnedorožnigini) tanyşdyrdy. Awtoulag tehniki taýdan üýtgemedi, emma goşmaça ulgamlary başgaça häsiýete eýe boldy.
Şeýlelik bilen, «X-Break» we «Advance» ulgamlarynda indi bagažnigiň gapysy üçin elektrik herekete getiriji bar, «X-Break» ulgamynda bolsa öňdäki oturgyçlary elektrik arkaly sazlamak mümkinçiligi peýda boldy. «Subaru» howpsuzlyk ulgamynyň programma üpjünçiligini täzeledi, şonuň esasynda bolsa yza hereket edilende awtomatik usulda duruzmak (awtotormoz) ulgamynyň netijeliligi artdy we päsgelçilik barada sesli duýduryşyň dowamlylygy hem ýokarlandy.
Ýapon bazary üçin öndürilen «Forester-iň» ähli görnüşleriniň özboluşly daşky aýratynlygy – akulanyň ýüzgüji şekilinde antennasynyň we bagažnigiň gapysy gara reňke boýalan spoýleriň bolmagydyr.
Ýapon «Subaru Forester 2024-iň» esasy hereketlendirijisi 2,0 litrlik göwrüme we 150 at güýjüne eýedir, alternatiw hereketlendiriji bolsa 174 at güýji bolan 1,8 litrlik turbo görnüşli motorydyr. Geçiriş guty hususy «Lineartronic» wariatorydyr, herekete geliş – ähli tekerler bilen. Ýaponiýada awtoulagyň bahasy 21 müň dollardan başlanýar.
