Lewerkuzeniň «Baýeriniň» we Eýranyň milli ýygyndysynyň 28 ýaşly hüjümçisi Serdar Azmun kärendesine italýanlaryň «Roma» klubuna geçýär diýip, žurnalist Fabrisio Romano habar berdi.
Çeşmäniň habar bermegine görä, ylalaşykda oýunçyny 12 million ýewro satyn almak mümkinçiligi hem goşular. Azmun Italiýa 24-nji awgustda agşam geler, ertesi gün «Romada» lukmançylyk barlagyndan geçer.
Azmuny şeýle hem Londonyň «Fulhemi» almaga synanyşdy, emma asly türkmen bolan eýranly futbolçy üçin «Romanyň» portugaliýaly tälimçisi Žoze Mourinýonyň gyzyklanmasy möhüm orun eýeläpdir.
Azmun «Zenitden» «Baýere» 2022-nji ýylyň ýanwarynda geçdi. Hüjümçi lewerkuzenlileriň toparynda 44 oýna gatnaşyp, bäş gol we bäş sany netijeli pas berdi.
