Hytaý Halk Respublikasynyň Döwlet geňeşiniň wise-premýeri He Lifen Täjigistanyň Parlamentiniň ýokarky palatasynyň başlygy Zoir Mahmadtoir we Duşenbe şäheriniň häkimi Rustam Emomali bilen “Türkmenistan - Hytaý” gaz geçirijisiniň 4-nji şahasyny gurmak boýunça ikitaraplaýyn hyzmatdaşlyk meselelerini ara alyp maslahatlaşdylar. Bu barada Täjigistan Respublikasynyň Hökümetiniň metbugat gullugyna salgylanyp, ORIENT habar berýär.
Bellenişi ýaly, gaz geçirijiniň 4-nji şahasyny gurmak işini çaltlandyrmak üçin Täjigistanyň energetika pudagyna hytaý maýa goýumlaryny we döwrebap tehnologiýalary çekmek möhümdir.
Ozal habar berlişi ýaly, Täjigistan öz çäginde gaz geçirijini gurmak üçin daşary ýurtlardan näçe hünärmeniň çekiljekdigi barada mälim edipdi. Türkmenistanyň we Hytaýyň gaz geçiirjiniň 4-nji şahasyny gurmak işini çaltlandyrmak isleýändikleri şu ýylyň ýanwarynda iki ýurduň ýokary derejeli resmi wekilleriniň gatnaşmagynda geçirilen gepleşiklerde hem mälim edilipdi. Şu ýylyň maýynda geçirilen “Merkezi Aziýa - Hytaý” sammitinde hytaý tarapy gaz geçirijini gurmak işini çaltlandyrmak isleýändigini ýene bir gezek tassyklady.
Türkmenistandan gözbaş aljak Täjigistanyň we Gyrgyzystanyň çäklerinden geçip Hytaýa barjak 4-nji gaz geçiriji şahasy ýurdumyzyň Hytaýa gaz eksportyny umumylykda ýylda 65 milliard kub metre ýetirmäge hem-de üstaşyr geçiriji ýurtlaryň tebigy gaza bolan islegini belli bir derejede kanagatlandyrmaga şert döreder.
