Germaniýanyň Volkswagen kompaniýasy ID.7 elektrik flagman sedanynyň ilkinji nusgasyny çykardy. Bu barada electrek.co habar berýär.
Şeýle hem täze önüm Volkswagen-iň hataryndaky altynjy elektrik awtoulag modeli bolar. ID.7 sedany 77 kWt kuwwatly çekiş batareýasyny aldy, zarýad bermezden 611 km-e çenli ýöreýär. Soň bolsa, 86 kWt batareýa we 696 km çak edilýän energiýa ätiýaçlygy bilen Pro S modifikasiýasy peýda bolar.
Kompaniýa täze elektrik sedanynyň uzak aralyga syýahat etmek üçin niýetlenendigini, onuň giň we amatly salonynyň hem-de dürli ösen tehnologiýalarynyň bardygyny aýtdy.
ID.7 awtoulaglary Germaniýanyň Emden şäherindäki Volkswagen zawodynda öndüriler. Bu model güýzde Ýewropa bazarynda peýda bolar we ABŞ-ly söwda dellallary ilkinji sedanlary 2024-nji ýylyň başynda alarlar.
