Gazagystanda Milli Bankyň wekilleri sanly teňňe taslamasynyň tanyşdyrylyş dabarasyny geçirdiler diýip, respublikanyň Ýokary auditor palatasynyň metbugat gullugynyň habarynda aýdylýar.
Gazagystanyň Milli bankynyň başlygynyň orunbasary Berik Şolpankulow we “Milli bankyň töleg we maliýe tehnologiýalaryny ösdürmek merkezi” Paýdarlar jemgyýetiniň başlygy Binur Žalenow sanly teňňäni synagdan geçirmek we onuň adaty nagt däl töleglerden nähili tapawudynyň bardygy barada gürrüň berdiler.
"Taslamanyň maksady Gazagystanyň milli töleg ulgamyny mundan beýläk-de ösdürmek we döwrebaplaşdyrmak, täze daşarky kynçylyklara uýgunlaşdyrmak" diýip, beýanatda nygtalýar.
Žalenow sanly teňňäniň nagt ýa-da nagt däl pullary çalyşmak üçin niýetlenmändigini – onuň ugurdaş ulanyljakdygyny düşündirdi. Onuň sözlerine görä, sanly walýutanyň birnäçe täsin tehnologiki aýratynlyklarynyň bardygy sebäpli ýurduň töleg ulgamynyň mundan beýläk-de ösmegini üpjün eder.
