Botlar CAPTCHA-nyň bot hüjümlerinden goragdan, adamlara garanyňda, has çalt we takyk baş alyp çykýar. Irwaýn şäherindäki Kaliforniýa uniwersitetiniň alymlary öz gözleglerinde şeýle netijä gelendiklerini aýtdylar.
Gözlegçiler dünýäde iň meşhur 200 web sahypasyny saýladylar. Olaryň 120-siniň CAPTCHA görnüşindäki botlardan ybarat goragy ulanandygy ýüze çykdy. Soňra 1400 meýletinçi dürli görnüşdäki 10 sany CAPTCHA synagyny çözdi: ýoýlan teksti tanadylar, şekilde “pazl” goýdular, birnäçe suratlary saýlap aldylar we ş.m. Synag wagtynda alymlar CAPTCHA-ny çözmegiň wagtyny we üstünlikli synanyşyklaryň göterimini ölçediler.
Gözlegiň awtorlary alnan maglumatlary awtomatiki botlary synagdan geçiren kärdeşleriniň ölçegleri bilen birleşdirdi. Görnüşi ýaly, ýoýlan teksti 50–84% takyklygy bilen tanamak üçin adama 9-15 sekunt gerek eken. Emeli aňly botlar bolsa şol bir meseläni 99,8% takyklygy bilen bir sekundyň içinde tamamlaýar.
Alymlar şeýle ýönekeý meseleleriň hakyky ulanyjyny botdan tapawutlandyrmaga indi kömek etmeýär diýen netijä geldiler.
