Parižiň «Pari Sen-Žermen» topary «Al-Hilal» bilen braziliýaly hüjümçi Neýmaryň transferi barada ylalaşyk gazandy diýip, lenta.ru «RMC Sport» neşirine salgylanyp habar berýär.
Çeşmede bellenilmegine görä, şertnama birnäçe günüň dowamynda tamamlanar. Oýunçynyň özi Saud Arabystanynyň çempionatyna geçmäge razylyk berdi.
10-njy awgustda «Al-Hilalyň» Neýmar üçin teklip eden mukdary mälim edilipdi. Toparyň futbolçy üçin 200 million ýewro tölemäge taýýardygy habar berildi. Bu mukdar «PSŽ-niň» tölegini, şeýle hem futbolçynyň zähmet hakyny öz içine alýar.
4-nji maýda Neýmaryň «PSŽ-den» gitmäge taýýardygy habar berildi. Parižiň topary 2023-nji ýylyň tomsunda hüjümçi bilen ýollaryny bölmek isleýär. Futbolçy «Barselona» geçmek üçin aýlyk hakyny azaltmaga taýýardygyny aýtdy.
Neýmar 2017-nji ýylyň tomsundan bäri «PSŽ-de» çykyş edýär. 31 ýaşly oýunçynyň bahasy 60 million ýewro diýlip çaklanylýar. Ol 2013-nji ýyldan 2017-nji ýyla çenli «Barselonada» çykyş edipdi.
