Boks boýunça dünýäniň absolýut çempiony Roý Jons garyşyk söweş sungatynyň (MMA) russiýaly pälwany Fýodor Ýemelýanenkony boks düzgünlerine laýyklykda söweşmäge çagyrdy. Jons bu barada TASS agentligine habar berdi.
Jons: "Fýodora Maýk Taýson bilen bokslaşmak hökman däl. Meniň bilen söweşibersin ahyry. Munuň diýseň şüweleňli, uly waka boljakdygyna ynanýaryn. Ikimizem rus türgenleri, bu gaty gyzykly bolar" - diýdi.
Ýemelýanenko mundan ozal The MMA Hour portalyna beren interwýusynda dünýäniň öňki absolýut çempiony, amerikaly pälwan Maýk Taýson bilen boks ýaryşyny geçirmek isleýändigini aýdypdy.
Ýemelýanenko 46 ýaşynda, ol garyşyk söweş sungatynda (MMA) 40 ýeňiş gazandy we 7 ýeňlişi bar, ýene bir söweşi hasaba alynmandy. Türgen Pride, Rings we WAMMA guramalarynyň öňki çempiony, dört gezek dünýä çempiony we söweş sambosynda dokuz gezek Russiýanyň çempiony. Häzirki wagtda Ýemelýanenko Russiýanyň MMA bileleşigine ýolbaşçylyk edýär.
Jons 54 ýaşynda. 1-nji iýulda boks oýnunda amerikaly Entoni Pettisden utuldy. Jons ýarym agyr agram derejesinde dünýäniň absolýut çempiony boldy, 1988-nji ýylda Olimpiýa oýunlarynyň kümüş medalyna eýe boldy.
