Sürüjisiz dolandyryş tehnologiýalaryna ýöriteleşýän Pony.ai kompaniýasy Toyota Motor (China/Investment/TMCI/ we GAC Toyota Motor/GTMC) bilen Guançžouda bilelikdäki kärhanany döretmek barada şertnama baglaşdy. Bu barada Sinhua ýazýar diýip, forbes.kz belleýär.
Üç tarapyň bilelikdäki kärhanany döretmek karary doly derejeli sürüjisiz taksileriň köpçülikleýin önümçiligini we geljekde olaryň giň gerimde ulanylyşyny ösdürmäge gönükdirilendir. Täze kärhananyň bir ýylyň dowamynda döredilmegine, maýa goýum möçberiniň bolsa 1 mlrd ýuandan (takmynan, 140 mln ABŞ dollary) geçmegine garaşylýar.
Üçtaraplaýyn hyzmatdaşlygyň çäklerinde GTMC kompaniýasy Pony.ai kompaniýasyna L4 awtonom dolandyryş ulgamlary üçin ýörite döredilen, Toyota ätiýaçlyk ulgamlary bilen üpjün edilen, Toyota markasynyň akkumulýatorly elektromobillerini iberer diýlip, Pony.ai-yň beýanynda aýdylýar.
Pony.ai-yň awtonom dolandyryş tehnologiýalary bolan bu awtomobiller Pony.ai-yň PonyPilot+ robotaksi hyzmat platformasy bilen üpjün ediler. Bilelikdäki tagallalaryň netijesinde geljekde robotaksi hyzmatlary ýolagçylar üçin elýeterli bolar.
Pony.ai kompaniýasynyň maglumatlaryna görä, kompaniýa eýýäm Hytaýyň Guançžou, Pekin, Şanhaý we Şençžen ýaly şäherlerinde jemgyýetçilik ýollary boýunça hereket edýän Toyota we Lexus markaly 200 töweregi robotaksini synag režiminde ulanýar.
