Duşenbe şäherinde Merkezi Aziýa wekilçilik edýän milli ýygyndylaryň gatnaşmagynda geçirilýän «CAFA Futsal Cup-2023» halkara futzal ýaryşynda ikinji tapgyryň duşuşyklary geçirildi.
Ikinji tapgyryň çäginde Täjigistanyň milli ýygyndysy bilen duşuşan Türkmenistanyň ýygyndy topary 2:4 hasabynda ýeňlişe sezewar boldy. Ýurdumyzyň milli ýygyndysynyň birinji tapgyryň çäginde Eýranyň ýygyndysyndan 2:1 hasabynda üstün çykandygyny bellemek gerek.
Tapgyryň beýleki duşuşyklarynda Owganystanyň ýygyndysy topary özbegistanly garşydaşlaryndan (4:3), Eýranyň ýygyndysy bolsa Gyrgyzystanyň ýygyndy toparyndan (1:0) üstün çykdylar.
Geçirilen iki tapgyrdan soň 6 utuk toplan Owganystanyň milli ýygyndysy ýaryş tertibinde öňdäki orny eýeleýär. Ýygyndy toparlaryň dördüsi – Özbegistanyň, Täjigistanyň, Türkmenistanyň hem-de Eýranyň milli ýygyndylary üç utukdan toplamagy başardylar.
Üçünji tapgyryň duşuşyklary 26-njy iýulda geçiriler: Türkmenistan – Özbegistan (14:00), Owganystan – Eýran (17:00), Täjigistan – Gyrgyzystan (20:00).
