ABŞ-nyň Saglygy goraýyş ministrliginiň Azyk önümleriniň we derman serişdeleriniň hiline gözegçilik edarasy (FDA) diňe bir Alsgeýmer keseliniň alamatlary bilen göreşmän, eýsem onuň ösüşini haýallatmaga mümkinçilik berýän ilkinji derman serişdesi bolan “Lekanemabyň” (täjirçilik ady Leqembi) ulanylmagyny gutarnykly tassyklady. Bu barada edaranyň metbugat relizinde habar berilýär.
“Şu günki çözgüt [derman serişdesiniň gutarnykly tassyklanmagy] Alsgeýmer keseline garşy dermanyň kliniki netijeliligi görkezendigi üçin kabul edildi” – diýip, FDA-nyň newrologiki derman serişdeleri bölüminiň başlygy Tereza Burakkio belledi. Ol edaranyň hünärmenleri tarapyndan geçirilen goşmaça barlaglaryň irki tapgyrda bu keselden ejir çekýän adamlar üçin derman serişdesiniň howpsuzlygyny we netijeliligini tassyklandygyny aýtdy. Hassalaryň bu kategoriýasy Alsgeýmer keseli bolan adamlaryň umumy sanynyň, takmynan, altydan bir bölegini düzýär. ABŞ-da bu keselden 6,5 milliondan gowrak adam ejir çekýär.
Alsgeýmer keseli ýuwaş-ýuwaşdan ýady ýitirýär we akyl başarnyklarynyň peselmegine getirýär, soňra hassalar “iň ýönekeý ýumuşlary ýerine ýetirmek” mümkinçiligini ýitirýärler diýip, FDA-nyň metbugat relizinde bellenilýär. Onuň anyk sebäpleri belli däl, ýöne ol neýronlaryň ölmegine we neýron baglanyşyklarynyň bozulmagyna getirýän adam beýnisindäki üýtgemeler bilen baglanyşyklydyr.
