Gernot Dýollner 1-nji sentýabrdan başlap, Markus Dýusmannyň ýerine Audi-niň başlygy bolar. Ol 1993-nji ýyldan bäri Volkswagen toparynda bolup, Panamera hatarynyň başlyklygyny hem öz içine almak bilen, dürli döwürde Porsche-de birnäçe ýokary wezipelerde işledi. 2020-nji ýyldan bäri Audi-e ýolbaşçylyk eden Dýusmannyň mundan beýläkki ykbaly resmi taýdan takyk aýdylmady.
Gernot Dýollner 1998-nji ýylda Porsche-niň ýokary ýolbaşçylygyna goşuldy. 2001-nji ýyldan 2010-njy ýyla çenli konseptleriň işlenip taýýarlanyşyna ýolbaşçylyk etdi we şol döwürde 918 Spyder superkaryny döretmek boýunça taslama gatnaşdy. Dýollner 2011-nji ýyldan 2018-nji ýyla çenli Panamera hatarynyň ösüşine gatnaşdy we 2021-nji ýyldan başlap bolsa Volkswagen-iň ähli önüminiň strategiýasynyň meýilleşdirilişine jogap berip gelýärdi.
Işgärler düzümindäki üýtgeşmeleriň näme bilen baglydygyny Audi takyk aýtmaýar. Resmi däl maglumatlara görä, kompaniýanyň programma üpjünçiligini işläp düzmekde gijä galynmagy bilen baglanyşykly täze modelleriň goýberilişinde agsalmagy konserniň ýolbaşçylygynyň nägile bolmagyna getiripdir. Mundan başga-da, kompaniýa Hytaý bazaryndaky ornuny ýitirýär.
