Ýewropa Bileleşiginiň 27 döwletinde gündelik isleg bildirilýän hyzmatlar we harytlar, şol sanda azyk önümleri we içgiler üçin bahalar düýpli tapawutlanýar. Bu barada ÝB-niň statistika edarasynyň maglumatlaryna salgylanyp, interfax.ru habar berýär.
Geçen ýyl iň gymmat ýurt Irlandiýa boldy, bu ýerde ýaşaýşyň bahasy Ýewropa Bileleşigi boýunça ortaça bahadan 46,4% ýokarydyr. Onuň yzyndan Daniýa (+44,5%) we Lýuksemburg (+36,8%) gelýär.
Uly ýurtlardan ortaça statistiki görkezijilere, esasan, Italiýa ýakyn boldy, bu ýerde sarp ediş sebedi Ýewropadaky ortaça bahadan bary-ýogy 0,2% gymmatdyr, şeýle-de, arifmetiki ortalyga Germaniýa (+8,9%) we Ispaniýa (-3,5%) ýakyn.
Şol bir wagtyň özünde, iň arzan ýurtlaryň hataryna Rumyniýa girýär, bu ýerde sarp ediş sebedine ÝB boýunça ortaça bahadan 42,2% az tölemeli bolýar. Sanawda Bolgariýa (-41,3%) we Polşa (-38,5%) hem bar.
Daniýa egin-eşikleriň we aýakgaplaryň bahasy boýunça ÝB-de liderdir, şol bir wagtyň özünde olar Bolgariýada has arzandyr diýip, Ýewrostatyň habarynda aýdylýar.
Ýöne yklymyň iň gymmat we iň arzan ýurtlary Ýewropa Bileleşigine girmeýär. Ýaşaýşyň bahasy boýunça liderler Şweýsariýa (+74,3%), Islandiýa (+59%) we Norwegiýadyr (+42,9%). Şol bir wagtyň özünde, sarp ediş sebedi Türkiýede Ýewropadaky ortaça bahadan 60%, Demirgazyk Makedoniýada 49% arzandyr.
