Özbegistanyň baýdagyny ahlak kadalaryny bozmakda, şeýle-de egin-eşik, örtgi we ş.m. görnüşinde ulanmak gadagan edildi. Kanuna degişli üýtgetmeleri Oliý Mažlisiň senatynyň deputatlary tassyklady. Bu barada senatyň metbugat gullugyna salgylanyp, rossaprimavera.ru habar berýär.
“Baýdagy we onuň şekilini görkezýän nyşanlary jemgyýetde etikanyň düzgünlerini we özüňi alyp barşyň düzgünlerini bozmakda ýa-da olary masgaralaýjy başga bir usullar bilen ulanmak gadagan edilýär” – diýip, metbugat gullugy habar berýär.
Şol bir wagtyň özünde baýdagyň nyşanlaryny egin-eşikde, şeýle-de tapawutly nyşan görnüşinde, ýöne diňe harby ýa-da başga bir döwlet gullugynda bolanlara we türgenlere ulanmaga rugsat berilýär.
Kanuna girizilen üýtgetmeler bilen Özbegistanyň ýaşaýjylaryna baýdagyň nyşanlaryny ulanmak rugsat berilýär. Şeýle-de, baýdagy jemgyýetçilik ýerlerinde, binalarda we beýleki desgalarda, awtotransport salonynda, resmi halkara çärelerinde ulanmak rugsat edilýär.
Mundan başga-da, baýdagy diňe bir resmi halkara çärelerinde däl, eýsem maşgala baýramçylyklarynda, jemgyýetçilik we döwlet işgärleriniň, harby gullukçylaryň jaýlanyşynda we ş.m. ýagdaýlarda ulanmaga rugsat berilýär.
Özbegistanyň baýdagyny sport ýaryşlarynda, köpçülikleýin bedenterbiýe, medeni we köpçülikleýin çärelerde hormat bilen ulanmaga rugsat berilýär.
