Germaniýanyň Volocopter kompaniýasynyň aerotaksisiniň nusgasy Fransiýada Le Buržedäki awia sergisinde ilkinji görkezme uçuşyny amala aşyrdy. Bu kompaniýanyň uçujy enjamlarynyň 2024-nji ýylda Parižde geçiriljek Olimpiýa oýunlarynda synag tertibinde ulanylmagyna garaşylýar.
Uçuş takmynan bäş minut dowam etdi. Kompaniýanyň wekilleriniň bellemegine görä, VoloCity diýlip atlandyrylýan bu enjam ýolagçy gatnawynda ulanylyp başlanmazdan ozal kosmetiki üýtgeşmelere sezewar bolar. Geljekde kompaniýa enjamyň iki ýolagçyny alyp bilýän uçarmansyz görnüşini bazara çykarmagy göz öňünde tutýar. Ulagyň bu görnüşiniň esasy artykmaçlyklaryndan biri, adaty dikuçarlar bilen deňeşdirilende, sesiniň ep-esli pes we gabarasynyň kiçi bolmagydyr.
VoloCity 18 sany elektrik hereketlendirijisi we 9 batareýa bilen enjamlaşdyrylandyr. Iki adamlyk multikopter 400-500 m belentlikde 110 km/sag tizlik bilen pilot bilen birlikde iki adamy götermäge ukyplydyr. Bir zarýadda yglan edilen uçuş aralygy 35 km.
