Şu gün, 19-njy iýunda Slowakiýa Respublikasynyň Türkmenistandaky Ilçisi (oturýan ýeri Daşkent ş.) Wiktor Boreski Türkmenistanyň Daşary işler ministriniň orunbasary B.Mätiýewe ynanç hatlarynyň nusgalaryny gowşurdy. Bu barada Türkmenistanyň DIM-niň saýty habar berýär.
B.Mätiýew Ilçini jogapkär wezipä bellenmegi bilen gutlady we türkmen tarapynyň diplomatik işleriniň durmuşa geçirilmegine goldaw we ýardam bermäge taýýardygyny nygtady.
Duşuşykda türkmen-slowakiýa gatnaşyklarynyň häzirki ikitaraplaýyn gün tertibi ara alnyp maslahatlaşyldy.
Türkmenistanyň Daşary işler ministriniň orunbasary iki ýurduň daşary syýasat edaralarynyň ugry boýunça bilelikdäki işlerine ünsi çekdi.
Mundan başga-da, gepleşikleriň dowamynda uly mümkinçiliklere eýe bolan söwda-ykdysady hyzmatdaşlygy has-da giňeltmegiň zerurlygy barada umumy pikir beýan edildi. Bu nukdaýnazardan söwda-ykdysady we ylmy-tehniki hyzmatdaşlyk boýunça hökümetara toparynyň nobatdaky mejlisini geçirmek hem-de iki ýurduň telekeçileriniň özara saparlaryny guramak ýaly meseleleriň üstünde durlup geçildi.
