Ähli subutnamalary düýpli öwrenenden soň, Ginnesiň rekordlar kitaby Hilda Baçi ady bilen tanalýan Hilda Effiong Bessiniň 93 sagat 11 minut wagt bilen iň dowamly aşpezlik ýaryşynyň (şahsy) rekordyny resmi taýdan täzeländigini tassyklap biler diýlip, rekordlar kitabynyň saýtynda habar berilýär.
26 ýaşly Nigeriýadan şef-aşpez, penşenbe güni, 11-nji maýda öz işine başlady we duşenbe güni, 15-nji maýa çenli işläp, aşhanada bolan dört gününiň dowamynda 100 pitiden gowrak nahar taýýarlady.
Hilda 100 sagat bolan rekordy goýmaga synanyşdy, ýöne ýedi sagat onuň ahyrky netijesinden aýryldy, sebäbi ol rekord goýmaga synanyşygynyň başynda ýalňyşlyk bilen dynç almak üçin berilýän arakesmeleriň birinde goşmaça minut aldy.
Düzgün boýunça, gatnaşyja her üznüksiz iş sagadyna dynç almak üçin bäş minutlyk arakesme berilýär. Eger bu arakesmelerden peýdalanylmasa, olar ýygnanyp biler. Bu synanyşyk wagtynda Hildanyň wannadan peýdalanyp ýa-da uklap biljek ýeke-täk ýagdaýydy.
87 sagat 45 minut bolan öňki rekord 2019-njy ýylda Lata Tondon (Hindistan) tarapyndan goýuldy.
Hilda “Nigeriýanyň aşhanasyny karta çykarmak” we “ýaş afrikaly aýallary öz arzuwlaryna ýetmäge ruhlandyrmak” üçin bu rekordy goýmagy maksat edindi.
“Şeýle-de, men öz mümkinçiliklerimi giňeltmek we ukybymy barlap görmek üçin bu rekordy täzelemek isledim” – diýip, ol belledi.
