Azerbaýjanyň paýtagtynda Garaşsyz Döwletleriň Arkalaşygynyň agza ýurtlarynyň serhet goşunlarynyň ýolbaşçylarynyň Geňeşiniň 86-njy mejlisi geçirildi. Oňa gatnaşyjylar GDA döwletleriniň serhetlerinde durnuklylygy üpjün etmek meselelerini maslahatlaşdylar diýip, Sputnik Azerbaýjan ýazýar.
Duşuşyga Azerbaýjanyň, Ermenistanyň, Belarusyň, Gazagystanyň, Gyrgyzystanyň, Russiýanyň, Täjigistanyň, Türkmenistanyň we Özbegistanyň wekilleri gatnaşdylar. Taraplar hünärmenleri taýýarlamak we bilelikdäki okuwlary geçirmek ulgamynda hyzmatdaşlygy maslahatlaşdylar.
Mejlise gatnaşyjylar ýakyn hem orta möhlet üçin işleri meýilleşdirmek meseleleri boýunça 19 sany resminama gol çekdiler.
Indiki mejlis şu ýylyň oktýabrynda Ermenistanda geçiriler.
