ABŞ-nyň öňki wise-prezidenti Maýk Pens 2024-nji ýylyň noýabr aýynda geçiriljek nobatdaky prezident saýlawlaryna gatnaşmak üçin resminamalaryny tabşyrdy. Degişli maglumatlar duşenbe güni ABŞ-nyň Federal saýlaw toparynyň web sahypasynda çap edildi.
Pens Respublikaçylar partiýasyna wekilçilik edýär. Ol respublikaçylaryň adyndan prezidentlige dalaşgär görkezilmegini gazanmak isleýär. Şeýle-de, muňa ABŞ-nyň öňki prezidenti Donald Trump, Florida ştatynyň gubernatory Ron Desantis, ABŞ-nyň BMG-däki öňki ilçisi Nikki Heýli, Günorta Karolina ştatynyň senatory Tim Skott we beýleki syýasatçylar dalaş ederler.
NBC teleýaýlymy ozal Pensiň şu hepde ýurduň prezident saýlawlarynyň öňýanyndaky ýaryşyna resmi taýdan girmek isleýändigini habar beripdi.
ABŞ-nyň indiki prezident saýlawy 2024-nji ýylyň noýabr aýynda geçiriler. 25-nji aprelde ABŞ-nyň häzirki prezidenti, demokrat Jo Baýden ýokary hökümet wezipesine gaýtadan saýlanylmaga dalaş etjekdigini aýdypdy.
