Merkezi Aziýa döwletleriniň Baştutanlarynyň we Ýewropa Geňeşiniň prezidentiniň ikinji duşuşygy Çolpon-Ata (Gyrgyzystan) şäherinde geçirildi. Oňa Ýewropa Geňeşiniň Başlygy Şarl Mişel, Gyrgyz Respublikasynyň Prezidenti Sadyr Japarow, Gazagystanyň Prezidenti Kasym-Žomart Tokaýew, Täjigistanyň Prezidenti Emomali Rahmon, Özbegistanyň Prezidenti Şawkat Mirziýoýew we Türkmenistanyň Ministrler Kabinetiniň Başlygynyň orunbasary Nurmuhammet Amannepesow gatnaşdy.
Konstruktiw ýygnagyň dowamynda gatnaşyjylar geçen ýyl Astanada geçirilen ilkinji ýygnakdan soň Ýewropa Bileleşigi bilen Merkezi Aziýa döwletleriniň arasyndaky köptaraplaýyn we özara peýdaly hyzmatdaşlyga baha berdiler. ÝB bilen Merkezi Aziýanyň arasynda halkara wakalaryň çägindäki gatnaşyklar hem ara alnyp maslahatlaşyldy.
Duşuşyga gatnaşyjylar ministrleriň indiki ýygnagynda ÝB-MA Ýol kartasyny kabul etmäge taýýardyklaryny mälim etdiler, şeýle hem BMG-nyň Tertipnamasyna, hususan-da ähli ýurtlaryň garaşsyzlygyna, özygtyýarlygyna, çäk bitewiligine hormat goýmak, güýç ulanmazlyk ýa-da güýç ulanmak howpuny salmazlyk we halkara dawalary parahatçylykly ýol bilen çözmek ýörelgelerine ygrarlydyklaryny tassykladylar.
Owganystandaky ýagdaýyň ýaramazlaşmagy barada umumy alada bildirildi we bu ýurduň howpsuz, asuda, durnukly we gülläp ösýän ýurda öwrülmegine goşant goşmak islegi nygtaldy.
Duşuşygyň beýleki mowzuklarynyň arasynda Pariž şertnamasyna laýyklykda taraplaryň borçlary, suw we energiýa hyzmatdaşlygy, Merkezi Aziýada daşky gurşawy we biodürlüligi goramak, Aral deňzi meselelerine we ş.m. garaldy
Taraplar indiki duşuşygyny indiki ýyl ilkinji sammit görnüşinde geçirmek niýeti bilen yzygiderli duşuşmak barada ylalaşdylar. Özbek tarapy duşuşygy Özbegistanda geçirmegi teklip etdi.
