Türkiýäniň prezidenti Rejep Taýyp Ärdogan 28-nji maýda geçirilen ses berişligiň ikinji tapgyrynyň jemi boýunça döwlet baştutanynyň saýlawlarynyň ýeňijisi diýlip ykrar edildi. Saýlawlaryň degişli gutarnykly netijelerini Türkiýäniň Ýokary saýlaw geňeşiniň başlygy Ahmet Ýener mälim etdi diýip, TASS habar berýär.
“Komissiýa saýlawlaryň netijeleri bilen bagly kabul edilen garşylyklara garady. Prezident saýlawlarynyň ikinji tapgyrynyň gutarnykly netijeleri resmi gazetde çap etmek üçin iberildi. Netijelere görä, Ärdogan 52,18% ses alyp, Türkiýe Respublikasynyň saýlanan prezidenti hökmünde ykrar edildi” – diýip, Ýener belledi.
MST-nyň başlygy 28-nji maýda geçirilen saýlawlaryň ikinji tapgyrynda ýurduň içinde saýlawa gatnaşygyň 85,72%, onuň daşynda bolsa 56,34% bolandygyny habar berdi. Jemi gatnaşyk 84,15% boldy, 54,02 mln saýlawçy ses berdi. Ärdogan 27,83 mln ses, onuň bäsdeşi Kemal Kylyçdaroglu 47,82% ýa-da 25,5 mln ses aldy.
Şeýlelik bilen, Ärdogan respublikanyň saýlanan prezidenti hökmünde resmi taýdan ykrar edildi. Teswirnama laýyklykda, ol 3-nji iýuna çenli parlamentde kasam kabul edip, wezipe borçlaryny ýerine ýetirmäge girişmeli.
