Özbegistanyň «Milli Tiklaniş» (Milli Galkynyş) Demokratik Partiýasy ýurduň häzirki lideri Şawkat Mirziýoýewi 9-njy iýulda boljak möhletinden öň geçirilýän prezident saýlawlarynda prezidentlige dalaşgär hökmünde hödürledi. Bu syýasy partiýanyň metbugat gullugynyň habar bermegine görä, degişli karar çarşenbe güni geçirilen gurultaýda kabul edildi.
Mirziýoýew ozal prezident saýlawlaryny geçirmek baradaky kanuna gol çekdi. 30-njy aprelde Özbegistanda döwlet Baştutanynyň ygtyýarlyk möhletiniň bäş ýyldan ýedi ýyla çenli uzaldylmagyny göz öňünde tutýan we yzly-yzyna iki möhletden soň Mirziýoýewiň ýene saýlanmagyna mümkinçilik berýän konstitusiýanyň täze redaksiýasy meselesinde tutuş ýurt boýunça referendum geçirildi.
Özbegistanyň Saýlaw kodeksine laýyklykda, syýasy partiýalar saýlawdan alty aý öň gijä galman Adalat ministrliginde hasaba alnan halatynda prezidentlige dalaşgärleri hödürlemäge haklydyr.
Häzir respublikada bäş partiýa bar. Öňňin olaryň dördüsi gurultaý geçirdi we prezidentlige dalaşgärlerini hödürledi. Hususan-da, Halk-Demokratik we Ekologiýa partiýalary öz liderleri Ulugbek Inoýatowy we "Adolat" ("Adalat") Sosial Demokratik Partiýasy - Ýokary Kazyýetiň başlygynyň birinji orunbasary Robahon Mahmudowy we Liberal-Demokratik Partiýa - Mirziýoýewi hödürledi.
Şeýlelikde birbada iki syýasy birleşik tarapyndan döwlet Baştutanynyň wezipesine bir dalaşgäriň hödürlenmegi Özbegistanyň taryhynda ilkinji waka boldy.
