Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Eýran Yslam Respublikasyna iş saparynyň çäklerinde onuň maşgalasy Ogulgerek Berdimuhamedowa üçin ýörite medeni maksatnama taýýarlanyldy.
Tähranyň Halkara howa mezilinde belent mertebeli myhmany EYR-nyň Prezidentiniň Zenanlar we maşgala işleri boýunça orunbasary hanym Ensie Hazali garşylady. Özi üçin bölünip berlen kabulhanada gysga wagtlyk dynç alyşdan soňra, Türkmenistanyň Halk Maslahatynyň Başlygynyň maşgalasy kaşaň «Saadabad» toplumynda ýerleşýän taryhy-medeni desgalara baryp gördi.
XX asyryň başynda bina edilen “Saadabad” toplumy eýran binagärliginiň göwheri hem-de Eýranyň paýtagtynyň ajaýyp künjekleriniň biri hasaplanylýar. Bu toplum Tähran şäheriniň demirgazyk böleginde, ajaýyp Şemiran künjeginde ýerleşýär.
Bu topluma gezelenç gajarlar neberesiniň höküm süren zamanasynyň soňky ýyllarynda gurlan “Şahwand” köşgi bilen tanyşlykdan başlandy.
Soňra Ogulgerek Berdimuhamedowanyň maşgalasynyň awtoulag kerweni «Şahwand» köşgünden Farşçian adyndaky çeperçilik muzeýine tarap ugrady.
Bu muzeý dünýä meşhur häzirki zaman eýran suratkeşi Farşçianyň eserleriniň ýeke-täk sergisidir, bu suratkeşiň döredijiligi eýran nakgaşlygynyň hem-de beýleki halk senetçiliginiň kemala gelmegine uly täsirini ýetirdi.
Muzeýde suratkeşiň yslam dünýäsinde hem-de Günbatarda giňden meşhur bolan eserleriniň 54-si saklanylýar.
Türkmenistanyň Halk Maslahatynyň Başlygynyň maşgalasy hanym Ogulgerek Berdimuhamedowa abraýly suratkeşiň sergisini gözden geçirenden soňra «Millad muzeýine» baryp gördi.
Umumy meýdany ýedi müň inedördül metre deň bolan “Millat muzeý” “Saadabad” toplumynyň iri binalarynyň biridir.
Bu binada 50-den gowrak otag bolup, olaryň her birinde täsin muzeý gymmatlyklary – Pehlewler neberesiniň wekillerine peşgeş berlen gymmatly sowgatlar ýerleşdirilendir.
