Iňlis milliarderi Riçard Brenson tarapyndan esaslandyrylan, hemra uçurmak bilen meşgullanýan Virgin Orbit kompaniýasy batandygyny mälim edenden birnäçe aý soň, işini bes etdi. Bu barada BBC teleradioýaýlymlar korporasiýasy çarşenbe güni habar berdi.
NASDAQ biržasynyň maglumatlaryna görä, kompaniýa emläklerini 36 million dollara ýa-da başlangyç bahasynyň bary-ýogy 1 göterimine satdy. Virgin Orbit -iň raketa önümçilik desgasyny we ştab-kwartirasyny bäsdeşi – Rocket Lab startapy 16,1 million dollara satyn aldy.
Ýanwar aýynda Virgin Orbit Angliýanyň çäginden ilkinji gezek emeli hemra uçurmaga synanyşdy we ol şowsuz boldy. Şonda kompaniýa maliýeleşdirmek meselesinde kynçylyk çekip başlady, şol sebäpli onuň ýolbaşçylygy işgärleriniň 85% -ini dessine işden aýyrdy.
Virgin Orbit 2017-nji ýylda esaslandyryldy we hiç haçan jemgyýetçilik kompaniýasy hökmünde girdeji gazanmady. Ol Virgin Atlantic awiakompaniýasyny öz içine alýan Brensonyň işewürlik-imperiýasynyň bir bölegi bolmak bilen, kiçijik hemralary ibermek üçin raketa-göterijileri işläp taýýarlamak we gurmak bilen meşgullandy.
