Gazagystan, Gyrgyzystan, Hytaý, Täjigistan, Türkmenistan we Özbegistan Hytaý – Merkezi Aziýa sammitiniň Sian jarnamasyna gol çekdi. Bu barada HHR-iň başlygy Si Szinpin žurnalistlere aýtdy diýip, TASS habar berýär.
“Biz bilelikde Hytaý – Merkezi Aziýa sammitiniň Sian jarnamasyna gol çekdik, duşuşygyň netijeleriniň sanawyny tassykladyk we Hytaý bilen Merkezi Aziýanyň arasyndaky gatnaşyklaryň geljekki ösüş meýilnamasyny kesgitledik” – diýip, Hytaýyň Merkezi telewideniýesi Si Szinpiniň sözlerini getirýär. Jarnamanyň teksti heniz neşir edilmedi.
HHR-iň ýolbaşçysy Hytaý bilen Merkezi Aziýa hyzmatdaşlarynyň özygtyýarlylyk, garaşsyzlyk, howpsuzlyk we territorial bitewülik meselelerinde birek-birege berk goldaw berjekdiklerini belledi. Mundan başga-da, taraplar her bir döwletiň milli şertlerine laýyklykda saýlanyp alnan birek-biregiň ösüş ýoluna hormat goýarlar we islendik bahana bilen ýurtlaryň içerki işlerine güýç gatyşygyna berk garşylyk görkezerler.
“Biz terrorizmiň, separatizmiň, ekstremizmiň, temmäki kontrabandasynyň we transmilli guramaçylykly jenaýatçylygyň islendik görnüşi bilen aýgytly göreşeris” – diýip, Si Szinpin aýtdy.
Hytaýyň lideri taraplaryň BMG-niň Düzgünnamasynyň maksatlaryny we ýörelgelerini berjaý etjekdigini, köptaraplaýynlygy we halkara gatnaşyklarynyň umumy ykrar edilen halkara kanunlaryny we kadalaryny gorajakdygyny, şeýle-de halkara adalatyny goldajakdygyny belledi.
Sammit 18-19-njy maýda Sianda geçirildi.
