Ak öý prezident Jo Baýdeniň girdejisi barada hasabaty neşir etdi, ondan 2022-nji ýylda prezidentiň gazanan girdejisiniň çapdan çykan kitaplary üçin gonorar mukdarynyň azalmagyna garamazdan öňki ýyl bilen deňeşdirilende sähel üýtgändigi gelip çykýar diýip, golosameriki.com habar berýär.
2022-nji ýylda Baýden gonorar görnüşinde 2,5 – 5 müň dollar aldy – bu prezidentiň bir ýyl ozal neşirýatlardan alan 30 000 dollary bilen deňeşdirilende ep-esli azdyr. Şeýle-de, ol “dilden we ýazmaça çykyşlary” üçin hem azyndan 3000 dollar gazandy. Ondan öňki ýyl prezident çykyşlary üçin tas 30 000 dollar gazanypdy.
Hasabatda birinji hanym Jill Baýdeniň hem girdejisi görkezilýär. Onuň hem kitap neşirleri üçin gonorarlary azaldy. 2022-nji ýylda ol bir ýyl ozalky kitap satuwyndan alnan 15 000 – 50 000 dollar bilen deňeşdirilende, 5 000 – 15 000 dollar gazandy.
Hasabata görä, prezident är-aýalyň umumy aktiwleri 1,09 – 2,57 mln dollar bilen bahalandyrylýar.
ABŞ-nyň prezidentiniň ýyllyk zähmet haky 400 000 dollara barabar. Demirgazyk Wirjiniýanyň Jemgyýetçilik kollejinde iňlis dilinden sapak berýän Jill Baýdeniň zähmet haky 82 335 dollara ýetýär. Olaryň girdejisiniň galan bölegi maýa goýumlardan gelen girdejileriň, pensiýa we sosial hasaplardan, şeýle-de ýazylan kitaplar üçin Baýdenleriň awtorlyk gonorarlaryny almak bilen meşgullanýan korporasiýalardan gelen tölegleriň hasabyna alyndy.
