Şwesiýaly aýdymçy Lorin Liwerpulda geçirilen “Ýewrowideniýe – 2023” bäsleşiginde “Tattoo” aýdymy bilen ýeňiji boldy. Ýeňijini yglan etmek dabarasy Bi-bi-si tarapyndan göni ýaýlymda görkezildi diýip, TASS habar berýär.
Lorin indi-pop, indi-rok, trans we trip-hop žanrlarynda aýdym-sazlary ýerine ýetirýär. 2012-nji ýylda “Euphoria” kompozisiýasy oňa “Ýewrowideniýede” ilkinji ýeňşi getirdi. Umumy alanyňda, şwesiýaly ýerine ýetirijiler bäsleşikde rekord ýedi gezek ýeňiş gazandylar, bu soňky 27 ýylda ýeňiş gazanyp bilmedik irlandiýaly ýerine ýetirijiler bilen deňdir.
Emin agzalarynyň we tomaşaçylaryň ses bermeginiň netijesi boýunça şwesiýaly bäsleşige gatnaşyjy 583 bal gazandy. Finlýandiýaly repçi Kaarija (Kaýariýa, hakyky ady – Ýere Peuhenen) 526 bal bilen ikinji boldy. Lorin aýdym-saz pudagynyň hünärmenlerinden, onuň bäsdeşi bolsa tomaşaçylardan has köp ses aldy.
Üçünji orny 362 bal bilen ysraýylly Noa Kirel eýeledi, dördünji orunda 350 bal bilen Italiýanyň wekili Marko Menýoni, bäşinji orunda 268 bal bilen norwegiýaly aýdymçy Alessandra ýerleşdi. 10 ýyl mundan ozal Nigeriýadan Ukraina göçüp gelen Andreý Gusulýakdan we Jeffri Kenniden ybarat ukrainaly duet Tvorchi 243 bal bilen altynjy orny eýeledi, ol tomaşaçylardan 189 bal aldy.
Çykyşy bilen programmany tamamlan britaniýaly bäsleşige gatnaşyjy Meý Mýuller bary-ýogy 24 bal gazanyp, 25-nji orny eýeledi. Iň bes bahany – 18 baly Germaniýadan Lord of the Lost topary aldy.
Ýeňijiler kesgitlenilende şou-biznesdäki hünärmenlerden düzülen emin agzalarynyň gatnaşyjylara beren ballary, şeýle-de şu ýyl bäsleşige gatnaşan 37 ýurtdan tomaşaçylaryň bahalary jemlendi. Mundan başga-da, bäsleşikde görkezilmedik ýurtlardan meşhur aýdym-saz muşdaklarynyň sesleri hasaba alyndy.
