Prezident Serdar Berdimuhamedow Aşyrguly Begliýewi başga işe geçmegi sebäpli Ministrler Kabinetiniň Başlygynyň nebitgaz meseleleri boýunça orunbasary wezipesinden boşatdy.
Nebitgaz toplumyna gözegçilik edýän täze wise-premýer wezipesine «Türkmengaz» döwlet konserniniň başlygy Batyr Amanow bellenildi. Bu barada şenbe güni geçirilen Hökümet mejlisinde habar berildi.
Aşyrguly Begliýew wise-premýer wezipesine 2023-nji ýylyň fewralynda bellenildi, ondan öň 2022-nji ýylyň aprelinden bäri Türkmenistanyň Prezidentiniň nebitgaz meseleleri boýunça geňeşçisi wezipesini eýeleýärdi. 2015-2017-nji ýyllarda «Türkmengaz» döwlet konsernine ýolbaşçylyk etdi.
Batyr Amanow «Türkmengaz» döwlet konserniniň başlygy wezipesine 2020-nji ýylyň iýulynda bellenildi. Ondan öň ol Türkmenbaşydaky nebiti gaýtadan işleýän zawodlar toplumynyň baş direktory we nebitgaz ulgamynda beýleki ýolbaşçy wezipelerde işledi.
