Özbegistanyň Liberal-demokratik partiýasy 9-njy iýulda geçiriljek prezident saýlawlaryna häzirki döwlet baştutany Şawkat Mirziýoýewi dalaşgär hökmünde görkezer. Bu barada TASS habar berdi.
Mirziýoýewiň dalaşgärligini görkezmek karary partiýanyň syýasy geňeşiniň anna güni geçirilen nobatdan daşary mejlisinde kabul edildi.
Saýlaw kodeksine laýyklykda, Özbegistanyň syýasy partiýalary Adalat ministrliginde saýlawlar geçirilmezden alty aýdan gijä galman hasaba alnan halatynda prezidentlige dalaşgärleri hödürlemek hukugyna eýedirler. Häzir respublikada bäş syýasy partiýa bar – Özbegistanyň Halk-demokratik partiýasy, “Milliý tiklaniş” partiýasy, “Adolat” sosial demokratik partiýasy, Özbegistanyň Liberal-demokratik partiýasy we Özbegistanyň Ekologiýa partiýasy.
