Russiýa Federasiýasynyň Prezidenti Wladimir Putin Prezident Serdar Berdimuhamedowy Ýeňşiň 78 ýyllygyny baýram etmäge bagyşlanyp, Moskwada geçirilmegi meýilleşdirilýän dabaraly harby ýörişe we çärelere gatnaşmaga çagyrdy.
Prezident Serdar Berdimuhamedow çakylyk üçin rus kärdeşine minnetdarlyk bildirdi.
Bu barada Russiýa Federasiýasynyň Baştutanynyň Türkmenistanyň Prezidenti Serdar Berdimuhamedow bilen 7-nji maýda geçirilen telefon arkaly söhbetdeşliginde aýdyldy. Bu barada «Watan» habarlar gepleşiginde habar berildi.
Söhbetdeşligiň dowamynda Serdar Berdimuhamedow Beýik Watançylyk urşunda faşizme garşy Ýeňiş gazanylmagynyň umumy taryhy hakydada aýratyn orun eýeleýändigini nygtady. Russiýada bolşy ýaly, biziň ýurdumyzda-da, Ýeňiş gazanmak ugrunda söweşenler hem-de şol ýowuz ýyllarda tylda janaýaman zähmet çekenler baradaky hakyda mukaddes sarpa goýulýandygy bellenildi.
Biz ýeňiş üçin janlaryny gurban edenlere çuňňur hormat goýýarys hem-de aramyzda ýaşap ýören uruş weteranlary alada bilen gurşalýar hem-de geljekde-de bu baradaky meselä uly üns berler diýip, Serdar Berdimuhamedow belledi.
Prezidentler Serdar Berdimuhamedow hem-de Wladimir Putin Beýik Watançylyk urşunda gazanylan Ýeňşiň ýakynlaşyp gelýän 78 ýyllygy bilen birek-biregi mähirli gutlap, iki ýurduň halklaryna abadançylyk we rowaçlyk baradaky arzuwlaryny aýtdylar.
