Günorta Koreýanyň Samsung Electronics kompaniýasy işgärlerine ChatGPT çat-botuny we şuňa meňzeş tehnologiýa önümlerini, maglumatyň syzylmagy gorkusy sebäpli, korporatiw enjamlarda ulanmagy gadagan etdi. Bu barada Bloomberg duşenbe güni kompaniýanyň içerki resminamasyna salgylanyp habar berdi.
Agentligiň berýän maglumatyna görä, aprel aýynda Samsung Electronics-iň inženerleri tötänden kompaniýanyň deslapky koduny ChatGPT-e ýüklemek bilen, onuň syzylmagyna ýol berdiler. Kompaniýa şu we şuňa meňzeş çat-botlara ýüklenen maglumatlaryň daşarky serwerlerde saklanýandygyny we şonuň üçin üçünji taraplara elýeterli bolup biljekdigini belleýär.
"Howpsuzlyk talaplaryny ak ýürekden berjaý etmegiňizi haýyş edýäris, düzgün bozmalar kompaniýanyň maglumatlarynyň syzylmagyna sebäp bolup biler, bu bolsa soňy tä işden çykarylmaklyga çenli baryp biljek düzgün-nyzam temmileriniň berilmegine sebäp bolup biler" – diýip, agentlik Samsung-yň gulluk resminamasyndaky sözleri getirýär.
Agentligiň düşündirişi ýaly, gadaganlyk korporatiw enjamlara we torlara degişlidir. Beýleki enjamlardan çat-bota girilende işgärlere awtorlyk hukugy bilen baglanyşykly maglumatlary ýüklemek gadagan edilýär. Muňa ugurdaşlykda, kompaniýa öz ChatGPT analogyny durmuşa ornaşdyrmagyň üstünde işleýär.
