Futbol assosiasiýalarynyň halkara federasiýasynyň (FIFA) prezidenti Janni Infantino 4-nji maýda Türkmenistana gelip görer. Bir günlük saparyň barşynda FIFA-nyň ýolbaşçysy ýurduň we milli futbol federasiýalarynyň ýolbaşçylary bilen futbol oýnuny ösdürmek hem-de bu ugurda özara gatnaşyklary giňeltmegiň ileri tutulýan ugurlaryny maslahatlaşar diýip, sişenbe güni «Türkmenistan: Altyn asyr» elektron neşiri habar berdi.
Infantinonyň Merkezi Aziýa boýunça iş sapary 2-nji maýda Täjigistandan başlady. Duşenbe şäherinde Infantino Merkezi Aziýa futbol assosiasiýalarynyň Kongresiniň sekizinji mejlisine gatnaşdy. Onuň barşynda Täjigistanyň Futbol federasiýasynyň prezidenti Rustam Emomali CAFA -nyň prezidenti wezipesine gaýtadan dört ýyllyk möhlete saýladny.
Şu hepdede Janni Infantino şeýle hem Gazagystana, Gyrgyzystana we Özbegistana baryp görer.
Belläp geçsek, 2022-nji ýylyň dekabrynda Türkmenistanyň Prezidenti Serdar Berdimuhamedow Katar Döwletine amala aşyran saparynyň dowamynda Dohadaky «Halifa» stadionynda FIFA-nyň prezidenti Janni Infantino bilen görüşdi. Şol gezek Futbol assosiasiýalarynyň halkara federasiýasynyň ýolbaşçysy Türkmenistanyň Prezidentiniň şol saparynyň sport ulgamynda, aýratyn-da, futbol babatda halkara derejedäki gatnaşyklary ösdürmekde ähmiýetini belledi.
